O Noia Harp Fest vén de pechar a súa décimo terceira edición co foco posto na produción propia, na innovación musical e nunha destacada presenza feminina que articulou boa parte da programación. Durante catro días, o festival volveu situar a vila como punto de encontro para o instrumento, pechando a entrega máis concorrida do seu historial tralo pleno de público nos seus distintos escenarios -o Teatro Coliseo Noela, o Liceo de Noia, as igrexas de Santa María A Nova e San Francisco, e a praza do Tapal-, onde mesmo quedou xente fóra en varios concertos.
A dirección fai un balance “moi positivo” dunha cita que combinou a presenza de grandes figuras internacionais coa estrea de proxectos creados especificamente para o evento.
No apartado de referentes globais, o festival contou co afropop de Sona Jobarteh, o jazz de Park Stickney, a interpretación da arpa gaélica de Siobhán Armstrong e o virtuosismo de Maeve Gilchrist, cuxo concerto no Coliseo Noela destacou especialmente polo seu ritmo, delicadeza e exhibición técnica.
No camiño da innovación e novos formatos -que o festival abriu no 2022 coa creación do Premio Portus Apostoli-, o Noia Harp Fest apostou por producións orixinais que colleitaron unha gran resposta por parte do público. Entre elas salientou o concerto da Banda do Noia Harp Fest xunto a Su Garrido Pombo, un formato cunha ducia de arpas e arranxos de Rodrigo Romaní que funcionou moi ben para levar a canción de autor galega a un novo terreo. Do mesmo xeito, tamén destacou especialmente a colaboración entre Beatriz Martínez e a DJ Acacia Ojea, unha aposta que soubo mesturar a música electrónica e a arpa de levas con criterio propio, fuxindo de fórmulas comerciais xa habituais na escena contemporánea.
No apartado musical, a dirección sitúa tamén entre o máis destacado desta edición a estrea absoluta de Alén do azul (peza gañadora do Premio Portus Apostoli, composta polo coruñés Teo Montero Rey) a cargo da Real Filharmonía de Galicia e do solista José Antonio Domené na xornada inaugural. Uns resultados que, segundo a organización, consolidan a evolución dun festival único no noroeste peninsular que soubo conxugar, un ano máis, o talento novo, a investigación patrimonial e a vangarda.
Coa 13ª edición xa concluída, a organización lembra que se mantén aberto o prazo de inscrición para participar na quinta edición do Premio Internacional de Composición “Portus Apostoli” para arpa solista e orquestra de corda. Este certame, nado no 2022, ten como obxectivo estimular a creación de novo repertorio e está dirixido a compositores e compositoras de calquera nacionalidade sen límite de idade. As persoas interesadas teñen ata o vindeiro 23 de decembro para enviar as súas partituras. As bases están dispoñíbeis na web www.noiaharpfest.gal.
O Festival Internacional de Arpa Vila de Noia é unha iniciativa promovida por Nalgures Producións e cuxa dirección artística recae na Asociación Cultural Noia Harp Fest. O evento, que se celebrou do 29 de xullo ao 1 de agosto, contou co apoio do Concello de Noia e da Xunta de Galicia a través de Turismo de Galicia e do proxecto Concertos do Xacobeo. Tamén colaboraron a Sociedade Cultura Recreativa Liceo de Noia, a Asociación Española de Arpistas (AEDA), a Deputación Provincial da Coruña e Acción Cultural Española.
