O comité de nomeamentos oficializa as candidaturas para as eleccións de 2026, onde tamén se renovarán a vicepresidencia e a tesouraría da organización.
A carreira pola presidencia da World Heart Federation (WHF) entra na súa fase decisiva.
O comité de nomeamentos da principal organización mundial dedicada á prevención e loita contra as enfermidades cardiovasculares fixo pública a súa proposta oficial de candidaturas para as eleccións de 2026. Entre os aspirantes a presidente electo figuran o prestixioso cardiólogo galego José Ramón González Juanatey e o cardiólogo chinés Junbo Ge.
A candidatura do noiés González Juanatey, foi proposta formalmente pola Sociedade Europea de Cardioloxía, consolidando a súa proxección internacional neste proceso electoral que definirá o rumbo futuro da federación.
Un proceso validado internamente
Dacordo co regulamento interno, a listaxe oficial de aspirantes foi revisada e remitida previamente ao consello da Federación Mundial do Corazón. Tras esta validación, procedeuse a comunicar a decisión tanto aos propios candidatos seleccionados como aos membros de pleno dereito da organización, quen terán o dereito ao voto no proceso electoral.
Para confeccionar esta listaxe definitiva, o comité analizou minuciosamente todas as propostas recibidas que cumprían cos estritos requisitos establecidos para a renovación de cargos.
