A asociación inclusiva Ambar, referente do Barbanza e de Galicia en atención a persoas con diversidade funcional, continúa consolidando o seu programa Tempo en Familia, un espazo de encontro no seu Centro de Recursos de Frións (Ribeira) deseñado para ofrecer apoio, formación e ferramentas prácticas ás familias e á contorna das persoas con diversidade funcional. Trátase máis en concreto dun espazo para a formación e o autocoidado, onde xornada aborda unha temática específica adaptada ás necesidades do colectivo. Tralo éxito da sesión de xaneiro, titulada Calma, movemento e conexión, onde os asistentes exploraron técnicas de ioga e estratexias de relaxación para a xestión do estrés, a asociación centrou a súa sesión do 26 de febreiro no fomento da vida autónoma.
Na xornada o protagonismo foi para o Servizo de Comunidade de Ambar. Este proxecto é un dos piares da entidade, cuxo propósito fundamental é Impulsar vidas independentes en comunidade. A través deste servizo, a asociación promove a inclusión (facilita que as persoas realicen actividades fóra do centro, no seu entorno real), brinda apoios personalizados (ofrece o soporte necesario para que cada persoa desenvolva o seu día a día con autonomía) e fomenta a pertenza (traballa para que as persoas se sintan parte activa e visíbel da sociedade).
As xornadas Tempo en Familia non son exclusivas para socios/as e familiares de persoas usuarias da Asociación Ambar, senón que están abertas a toda a comunidade interesada en aprender e compartir experiencias arredor da diversidade funcional. Moi axiña anunciarase a data e o tema da proposta para a xornada que se celebrará en marzo.
As persoas interesadas en asistir ás vindeiras sesións poden confirmar a súa praza por dúas vías:
Teléfono: 981 87 44 80
Correo electrónico: correo@asociacionambar.org
