O pleno do Concello de Boiro celebrado este mércores 14 de xaneiro, aprobou a participación do Concello no POS+ para gastos sociais extraordinarios da Deputación da Coruña cun importe total de 127.548,75 euros. A sesión pode verse como de costume na canle municipal de Youtube.
Este ano impútase a esta subvención un novo concepto, dotado cunha cantidade de 34.000 euros, para que as familias poidan facer obras de accesibilidade e adaptabilidade das vivendas tales como a eliminación de barreiras arquitectónicas que dificultan a mobilidade dentro do domicilio, instalación de ramplas ou plataformas de accesibilidade, adecuación de aseos, etc. co obxectivo de favorecer unhas condicións dignas e adaptadas ás necesidades das persoas dependentes.
Nesta anualidade vaise destinar unha cantidade de 17.280 euros para a adquisición de 7 camas articuladas e 6 grúas para a mobilización de persoas en situación de dependencia para seguir ampliando o catálogo de axudas técnicas en préstamo do que dispón o Concello de Boiro.
Mediante este programa o Concello de Boiro conta xa con 76 axudas técnicas como guindastres, colchóns antiescaras, cadeiras de rodas, camas articuladas, táboas de transferencia… coas que se ven prestando servizo a máis de 90 familias.
Outra partidas que se incorporan este ano é a destinada a ao equipamento tecnolóxico, á que destinan 11.041 euros para a adquisición dun sistema de IA que permita ás persoas usuarias coñecer os servizos aos que poden ter acceso, a posta en marcha un sistema de alertas SMS que posibilite establecer unha conexión directa e inmediata coa cidadanía en situacións de emerxencia e tamén a adquisición dun tótem informativo para a consulta sobre os procedementos e prestacións dos Servizos Sociais.
Ademais inclúese unha partida de 29.603 euros para o reforzo e ampliación do persoal técnico e administrativo do departamento de Servizos Sociais; 27.874 euros para ampliar as partidas municipais de emerxencia social; unha partida de 7.750 euros para respiro e conciliación familiar destinados a aquelas persoas que asumen responsabilidades de coidado.
