O Concello de Muros informou esta semana da posta en marcha do Banco Solidario de Préstamo de Materiais Adaptados, un servizo municipal impulsado pola área local de Servizos Sociais para recoller doazóns de axudas técnicas e prestalas gratuitamente a persoas en situación de dependencia ou discapacidade.
O banco permitirá a achega de balde (a quen o precise) de materiais e utensilios como cadeiras de rodas, camas hospitalarias, guindastres, elevadores, andadores, muletas ou colchóns antiescara. Trátase de dar unha segunda ou unha terceira vida a aparellos ou aveños que temos na nosa casa e que xa non usamos, podendo beneficiar a outras familias. Dende o Concello de Muros salientan que “reutilizar é coidar das persoas e do noso entorno”. Quen precise máis información pode chamar ao teléfono 981 762 465 ou contactar coa conta de correo electrónico servizos.sociais@muros.gal.
“Esta iniciativa presenta varias vantaxes: solidariedade comunitaria, redución de custes, sostibilidade, rapidez e mellora dos servizos sociais”, segundo destacou a alcaldesa, María Lago.
