CONGALSA, empresa da Pobra referente en alimentación con produtos pesqueiros, innovación e sustentabilidade, adxudicou a Espina & Delfín o deseño, a construción e a posta en marcha da súa nova depuradora de augas industriais (EDARI). A infraestrutura terá unha capacidade para tratar nun futuro ata 1.000 metros cúbicos de auga ao día e o obxectivo de CONGALSA é optimizar o tratamento das augas residuais do seu complexo empresarial na Pobra do Caramiñal, no Polígono da Tomada.
En concreto, a finalidade do proxecto é dispoñer de unha instalación “fiable, escalable e operable”, minimizando interferencias coa actividade produtiva e priorizando a seguridade durante a execución e a posta en marcha, segundo apuntaron fontes da empresa da Pobra, engadindo que con esta nova EDARI, “reforzamos a nosa folla de ruta de sustentabilidade industrial, avanzando nunha xestión da auga máis eficiente e robusta”.
En paralelo, a compañía continúa desenvolvendo os plans de ampliación do seu complexo para acompañar o crecemento da actividade.
En palabras do presidente de CONGALSA, Luis Miguel Simarro, “con esta nova depuradora reforzamos o noso compromiso coa sustentabilidade. Optimizará o tratamento de augas residuais, de forma aliñada co incremento da capacidade produtiva dos últimos anos e favorecendo procesos máis eficientes e respectuosos co medio ambiente. Avanzamos así nun modelo de crecemento industrial responsable”.
Pola súa banda, Espina & Delfín é líder do sector en captación, tratamento, potabilización e depuración de augas residuais industriais. A empresa compostelá ofrece solucións a medida para o tratamento de augas para todo tipo de industrias e conta co seu propio departamento de enxeñería. Óscar Rodríguez, administrador solidario de Espina & Delfín sinalou que “para nós é un orgullo colaborar con CONGALSA nun proxecto industrial de referencia en Galicia. O noso equipo conta cunha ampla experiencia no deseño, construción e xestión de depuradoras industriais en diferentes sectores, desde industria láctea, cárnica, do metal e conserveira, entre outras. Imos envorcar toda a nosa experiencia entregar unha depuradora robusta e operable, cunha posta en marcha segura e unha integración que minimice calquera interferencia na actividade produtiva”.
CONGALSA, empresa galega especializada en elaboración e comercialización de referencias alimentarias e en pratos preparados, consolídase ano tras ano como unha das compañías líderes no seu sector de actividade grazas á súa aposta constante pola innovación. En 2024, facturou 173 millóns de euros, o que supón un crecemento do 14 % respecto ao ano anterior.
Pola súa banda, Espina & Delfín é o principal grupo galego que se ocupa do ciclo integral da auga, sector no que presta asistencia técnica, deseña, fabrica, constrúe e mantén infraestruturas diversas; á vez que xestiona servizos de abastecemento, saneamento e depuración. Unha sexta parte dos concellos de Galicia e empresas públicas e privadas de España confían nos seus servizos. A empresa tamén executa obras hidráulicas e civís en Portugal, Senegal, Colombia e Haití.
