Co inicio do novo ano, a asociación Callejeros Barbanza conta en Ribeira con nova sede e cunha tenda solidaria, no histórico local que ata hai pouco ocupaba a Ferretería Mariano, na praza do Concello, cuxo propietario cedeu solidariamente o inmóbel á entidade animalista. Trátase, como lembraremos, dunha asociación benéfico-social envorcada en boa medida no coidado animal que atende cada ano varios centos de gatos aos que lles proporciona un lugar para vivir, atención médica e alimentos, ademais de esterilizacións, vacinacións e coidados.
Coa apertura da tenda solidaria de Ribeira búscase cubrir boa parte dos importantes gastos que implica o coidado da importante poboación felina do concello. Dende alí distribúense todo tipo de artigos relacionados cos animais: roupa, xoguetes ou artigos de menaxe, entre outros obxectos.
Dende a asociación indicaron que teñen aínda unha débeda veterinaria duns 20.000 euros que agardan afrontar cos beneficios obtidos e coa colaboración da veciñanza.
No primeiro andar do local estanse a perfilar obradoiros, charlas e xuntanzas de traballo e no baixo a tenda solidaria.
Ademais do devandito, Callejeros Barbanza busca coa súa nova tenda traballar na sensibilización da veciñanza sobre o importante que é o coidado animal e a tenza responsábel de animais.
