O Auditorio do Centro Cultural e Xuvenil de Muros abrirá o ano 2026 sendo un dos primeiros espazos en proxectar Rondallas, a nova e agardada longametraxe dirixida por Daniel Sánchez Arévalo, que poderá verse durante a fin de semana do venres 2 ao domingo 4 de xaneiro.
Con esta estrea, Muros convértese nun dos primeiros concellos en achegar ao público esta comedia vitalista ambientada nun pobo mariñeiro galego, que, segundo avanza o Concello, “fala da memoria, do loito compartido e da forza da música tradicional como motor para volver mirar cara adiante”.
O filme conta cun elenco integramente galego encabezado por Javier Gutiérrez, María Vázquez e Tamar Novas, xunto a Judith Fernández, Carlos Blanco, Fer Fraga, Xosé A. Touriñán, Marta Larralde e Lola López Rodríguez.
Dende a Concellería de Cultura, Caridad González destaca que “Rondallas é unha película moi especial, profundamente ligada á identidade, á memoria colectiva e á música tradicional galega, e parécenos unha forma magnífica de comezar o ano cun cinema que emociona e que fala do noso”.
A concelleira subliña tamén “a aposta do auditorio por achegar estreas recentes e cinema galego de calidade ao público da vila”.
Horarios
Venres, 2 de xaneiro ás 20:30 h
Sábado, 3 de xaneiro ás 20:30 h
Domingo, 4 de xaneiro ás 19:00 h
Entradas dispoñibles na billeteira electrónica do Concello de Muros e nas oficinas do Centro Cultural e Xuvenil de Muros.
