Comezaron en Santa Uxía os preparativos para contar novamente, nesta tempada de Nadal, cunha pista de xeo na explanada do porto, impulsada pola Asociación de Empresarios de Ribeira co obxectivo de mellorar a oferta de lecer para veciños e visitantes ao mesmo se tempo que se dinamizan as visitas e as compras aos establecementos locais. A patronal comunicou que “tras obter todos os permisos necesarios, xa comezamos cos preparativos da pista de xeo no Malecón; iremos informando sobre como vai avanzando a montaxe, e temos previsto abrir as súas portas o próximo 28 de novembro”.
Segundo confirmaron, “será un espazo de diversión para todas as idades durante a tempada do Nadal e, un ano máis, converterase nun punto de encontro para veciños e visitantes, apoiando o comercio local”.
Esta campaña está co-financiada pola Xunta de Galicia, a Deputación da Coruña e o Concello de Ribeira.
A un nivel máis amplo, a pista de xeo ten o obxectivo de completar e enriquecer a oferta do Barbanza durante as festas de Nadal e fortalecer, a maiores, a dinamización comercial durante estas celebracións.
O ano pasado, dada a boa acollida que tivo a pista entre a veciñanza do concello e da comarca, decidiuse ampliar a duración da mesma ata o 19 de xaneiro.
