Os bombeiros do parque provincial de Boiro tiveron que intervir, a última hora da tarde do luns, para abrir unha vivenda situada no núcleo de Cabo de Cruz, despois de que ninguén respondese ás chamadas.
A actuación produciuse a petición da Garda Civil do posto de Boiro, que participaba nun operativo de procura dun veciño da zona que levaba varios días sen dar sinais de vida e podería atoparse indisposto no seu domicilio.
Segundo informaron fontes próximas, foi a familia quen deu a voz de alarma, ao non ter noticias del nas últimas xornadas, polo que solicitaron axuda ás forzas da orde para coñecer o seu paradoiro.
Unha vez accedéronse ao interior da vivenda, confirmáronse as peores sospeitas, xa que os efectivos atoparon o corpo sen vida do propietario, un home duns 60 anos, que padecía problemas de saúde.
Fontes da Garda Civil indicaron que o cadáver non presentaba signos de violencia, polo que se descarta a intervención doutra persoa e todo apunta a que o falecemento se produciu por causas naturais.
Os restos foron trasladados ao Instituto de Medicina Legal de Santiago, onde se lle practicará a autopsia para determinar as causas exactas da morte.
