A sección sexta da Audiencia Provincial da Coruña absolve ao acusado de tentar matar a un home no interior dun edificio de Ribeira en abril de 2022. O tribunal entende probado que a vítima recibiu “un forte golpe na cabeza cun obxecto contundente” e que as lesións que sufriu “eran potencialmente susceptíbeis de causarlle a morte e supuxeron un risco vital grave”.
Con todo, conclúe que non existen probas directas nin indiciarias suficientes para desvirtuar a presunción de inocencia. Os maxistrados explican na resolución que “a declaración da vítima, aínda que foi considerada proba de cargo, mostrou inconsistencias e falta de persistencia na identificación do agresor, o que afectou a súa credibilidade”.
Ademais, segundo consta na sentenza, “non se atoparon probas indiciarias concluíntes, como ADN ou gravacións de cámaras de seguridade, que vinculasen ao acusado co feito delituoso”.
Por iso, os maxistrados absolven ao sospeitoso do delito de homicidio en grao de tentativa do que estaba acusado. A sentenza non é firme, pois cabe presentar recurso ante o TSXG.
