O Náutico de Ribeira organiza esta fin de semana, 6 e 7 de setembro, a XIX Regata GADIS, unha cita que desde hai tres anos está orientada aos máis pequenos co obxectivo de promover e garantir o futuro da vela, tanto nas clases olímpicas como na modalidade de Cruceiro.
A presentación tivo lugar na biblioteca do club, nun acto conducido polo presidente da entidade, José Luis Torres Colomer, acompañado polo xerente da área de Santiago de GADISA, Román Roo; o delegado da compañía en Ribeira, Luís Vázquez; e os directivos do Náutico, José Luís Lomba, Justo Arevalillo e José Díaz.
Torres Colomer destacou que a competición se desenvolverá diante da praia de Coroso e contará cun amplo dispositivo de seguridade no mar, no que participarán, ademais das embarcacións de cada club, efectivos de Protección Civil e Cruz Vermella.
Segundo explicou o comodoro José Luís Lomba, estarán convocadas dúas clases: Optimist e ILCA 4 (antigo Láser 4.7). No caso do Optimist, dividiranse en tres grupos: Regata Ouro, Regata Prata e Escola. O programa contempla a realización de seis mangas en total, tres por cada xornada.
A competición reunirá arredor dun centenar de novos regatistas, procedentes das escolas de vela da comunidade, moitos deles debutantes tras iniciarse neste deporte durante o verán. O sábado, se o tempo o permite, a primeira saída está programada para as 14:30 horas, mentres que o domingo as probas comezarán ás 10:30 horas. A entrega de premios celebrarase ás 18:00 horas.
Desde a organización destacouse tamén o apoio de GADIS, patrocinador principal. “Despois de 19 edicións, pódese dicir que a continuidade da regata está garantida”, sinalou Román Roo, quen subliñou a coincidencia entre os valores da empresa e os da vela: amor pola natureza, actividade física e vida saudable.
