O Concello de Porto do Son rendeulle unha homenaxe a Carmen de Lourenzo, veciña de Baroña, con motivo do seu 103 aniversario. O alcalde, Luis Oujo, xunto co concelleiro de Benestar Social, Pepe Lijó, achegáronse esta pasada fin de semana ata a súa casa para compartir unha xornada tan especial.
Durante a visita, os representantes municipais trasladáronlle persoalmente os parabéns en nome de toda a veciñanza e fixeron entrega dun fermoso agasallo floral, así como da insignia de honra do municipio sonense.
Con este xesto, o Concello quixo recoñecer a longa vida de Carmen e destacar a importancia de preservar a memoria e o respecto polas persoas maiores, exemplo de tradición e identidade para Porto do Son.
