As Rías Baixas e a comarca de Santiago vivirán este xoves 21 de agosto , San Pío, unha xornada marcada pola entrada dunha cuña anticiclónica, que deixará un tempo de transición con intervalos de nubes e claros.
Os ceos presentaranse anubrados intermitentes, con posibilidade dalgún chuvasco feble e ocasional, especialmente nas áreas máis ao norte. Nas Rías Baixas, a mañá amencerá con alternancia de nubes e claros, mentres que en Santiago os ceos estarán máis cubertos, mellorando cara á noite.
As temperaturas mínimas manteranse sen cambios significativos, mentres que as máximas experimentarán un lixeiro ascenso, situándose en valores agradables.
No relativo ao vento, soprará de compoñente norte, en xeral frouxo, pero intensificándose ata moderado no litoral durante a tarde e a noite, sobre todo na fachada atlántica.
O venres volve o tempo seco e soleado en xeral, con suba da temperatura.
O noso mar: Vento do norte á mañá e á noite e do noroeste á tarde, forza 3 a 4 á mañá, 4 a 5 á tarde e 3 a 5 á noite. Marusía á mañá e á noite e forte marusía á tarde. Visibilidade boa. Mar de fondo do noroeste, con ondas de 1 a 1.5 metros.
