As altas presións e unha masa de aire cálido deixarán temperaturas de ata 40ºC no interior
Galicia comezará a semana baixo a influencia das altas presións e cunha masa de aire moi cálido en superficie, o que traerá consigo unha xornada de ceos maioritariamente despexados este luns.
Agárdanse algúns bancos de néboa matinais no interior e entrada de brétemas costeiras ao longo do día, especialmente nas zonas litorais.
As temperaturas seguirán en ascenso, sobre todo as máximas, que poderán acadar os 40ºC na metade sur, en especial en zonas do interior de Ourense e Pontevedra. No resto do país, os valores tamén serán moi altos para a época. O vento soprará frouxo do nordés, con intervalos moderados no litoral.
O noso mar: Vento do noroeste á mañá e á tarde e do norte á noite, forza 1 a 2 á mañá, 2 a 3 á tarde e 3 a 5 á noite. Mar rizado á mañá, mar ovellado á tarde e marusía á noite. Visibilidade boa. Mar de fondo do noroeste, con ondas de 0.5 a 1 metros á mañá, 0.5 a 1.5 metros á tarde e 1 a 1.5 metros á noite.
