Do 22 ao 27 de xullo celebrarase unha nova edición da Festa da Xouba de Rianxo. Ademais de na propia xouba, a organización (Xouba de Rianxo e o Concello) porá o foco na cultura mariñeira que xira en torno ao dito produto gastronómico: a xouba. Mesas redondas, visitas guiadas, encontros de embarcacións, tapas variadas nos bares da vila e do concello e moita música serán os grandes ingredientes da celebración.
Dende o Concello confirmaron que nos vindeiros días iranse anunciando as diferentes actividades do programa, que todo apunta a que inclúa novamente o roteiro gastronómico Tapea con xeito! (polos establecementos rianxeiros), concertos, degustacións, obradoiros, visitas guiadas, roteiros marítimos e exaltacións de música e baile tradicionais. A Festa da Xouba conta coa colaboración da Consellería de Mar. Trátase, en palabras da Xunta, “dun relevante evento” que constitúe unha auténtica exaltación deste peixe que conta co selo de calidade propio dende 2023: Xouba de Rianxo, Pesca Artesanal, Arte do Xeito.
