O Festival Internacional de Arpa Vila de Noia (NHF) estreará, da man da Real Filharmonía de Galicia, Cuatro historias gallegas, a creación do arxentino Federico Beilison gañadora do III Premio Internacional de Composición Portus Apostoli. A cita, na que participarán coma solistas as arpistas Claudia Besné e Francesca Romana Di Nicola, terá lugar o 7 de agosto no Teatro Coliseo Noela ás 20.30 horas e porá o ramo á 12ª edición do único festival do noroeste dedicado ao instrumento.
O Noia Harp Fest decorrerá do 30 de xullo ao 20 de agosto, mais este ano suma unha quinta xornada de actuacións na que se producirá a estrea mundial da obra gañadora do III Premio Portus Apostoli. A Real Filharmonía de Galicia, baixo a dirección de Sebastian Zinca, e con Claudia Besné e Francesca Romana Di Nicola como solistas, será quen interprete esta creación do compositor e guitarrista arxentino, ademais da peza Folías Celtas, mención de honra do Portus Apostoli, composta polo uruguaio Gabriel Bussi. O programa completarase con pezas de Claude Debussy e Maurice Ravel.
As entradas para esta quinta e derradeira xornada de programación da 12ª edición do Festival Internacional de Arpa Vila de Noia -organizado por Nalgures Producións, baixo a dirección da asociación Noia Harp Fest, e co apoio institucional do Concello de Noia, Xunta de Galicia a través da Axencia Turismo de Galicia no marco dos Concertos do Xacobeo, e de Acción Cultural Española AC/E, ademais da colaboración da Deputación da Coruña- están á venda desde esta mañá a través da plataforma en liña www.ataquilla.com.
