A comezos desta semana produciuse un novo acto vandálico contra o patrimonio histórico e artístico na Pobra do Caramiñal, segundo deu a coñecer unha cidadá que xa puxo os feitos en coñecemento das autoridades municipais e dos medios de comunicación.
O Pazo da Mercé —situado na freguesía de Santo Isidro de Posmarcos— é un dos monumentos máis senlleiros da comarca do Barbanza, tanto pola súa historia como polos personaxes que acolleu, en especial o ilustrado Frei Martín Sarmiento e o escritor universal Ramón María del Valle-Inclán. Este conxunto consta dun edificio residencial, a súa capela, pombal, cruceiro, un muro perimetral co fornelo que servía de fonte, así como outros elementos de valor histórico.
Tras sufrir un incendio en 1983 —cuxas causas non foron aclaradas—, o pazo padeceu o espolio de parte do seu patrimonio, incluído o retablo barroco, varias imaxes centenarias, a escultura da Santísima Trindade na fachada da capela, o escudo do Real Mosteiro de San Martín Pinario e o mascarón que vertía a auga na fonte. A deteriorización continuou co paso dos anos, a falta de conservación e a desatención tanto dos propietarios como das autoridades públicas, a pesares das leis vixentes de Patrimonio Cultural de Galicia e de Rehabilitación de Galicia.
A esta situação súmase agora a aparición de grandes pintadas de graffiti nas súas centenarias paredes, un dano que non é un simple acto vandálico, senón un atentado contra un ben histórico de toda a sociedade. A denunciante exixe que se identifique a autoría, se impoña a sanción que corresponda, así como a reposición do pazo ao seu estado orixinal, considerando que os graffiti están asinados e están situados na parede da capela, junto á beirarrúa e á estrada C-550, onde é seguro que houbo testemuñas.
