A Catedral de Santiago volveu ser obxecto de vandalismo. Nesta ocasión, a fachada da praza da Inmaculada apareceu con pequenas pintadas en italiano, apenas visibles desde a distancia, pero claramente perceptibles ao achegarse.
A indignación non tardou en aparecer entre veciños, visitantes e institucións, que condenan de forma unánime esta nova agresión a un dos bens patrimoniais máis valiosos de Galicia.
Non é a primeira vez que o templo compostelán sofre este tipo de ataques. O caso máis grave produciuse en 2018, cando se pintaron bigotes e o nome da banda KISS sobre unha figura do século XII na fachada das Praterías. A restauración daquela peza tivo un custo de 12.000 euros.
A pesar de que este tipo de actos están sancionados pola lei con multas de entre 6.000 e 150.000 euros, identificar os responsables segue a ser un reto. Isto reabre o debate entre quen aposta por un maior control e vixilancia, e quen sinala a educación cidadá como a verdadeira solución a longo prazo.
A campaña impulsada polo Concello de Santiago baixo o lema “Un patrimonio para gozar, pero tamén para coidar”, busca precisamente sensibilizar á poboación sobre a necesidade de preservar un legado que é de todos. Unha mensaxe que, á vista dos feitos, non chegou a todos.
