Coma todos os anos o Concello de Rois conmemorará o Día das Letras Galegas cunha ampla programación cultural e deportiva. Entre as actividades previstas inclúese a sexta edición da Andaina do Santo Isidro – Letras Galegas, con saída (10.00 horas) e chegada no Polideportivo Municipal e un percorrido de 14 quilómetros con coplas da tradición oral de Rois. As inscricións poden facerse ata o 14 de maio na web www.emesports.es.
As persoas participantes entrarán nun sorteo de zapatillas deportivas. Para optar a estes agasallos terán que facerse unha foto nos puntos quilométricos do percorrido, onde atoparán unha copla da tradición oral galega. As imaxes, nas que deberán figurar os indicadores quilométricos, deberán subirse ás redes sociais Facebook e Instagram en aberto e co cancelo #Roiscoasletras. Quen precise máis información, tena ao seu dispor na Rede, ao igual que as ferramentas precisas para faceren as inscricións.
