O Parlamento de Galicia aprobou este martes 27 de maio, co voto en contra de BNG e do PSdeG, a proposición non de lei do Grupo Popular a través da que se esixe ao Concello da Pobra do Caramiñal e á Dirección Xeral de Costas do Ministerio para a Transición Ecolóxica e o Reto Demográfico “a asunción das responsabilidades polos vertidos detectados na Ribeiriña”, para o que, sinálase, “é necesario a adopción urxente das medidas necesarias para corrixir as deficiencias que os provocan e evitar novos episodios contaminantes”. En concreto, pídese ao Goberno central que “axilice o plan de investigación e que antes do 18 de xullo presente o seu informe final, xa que a partir dos resultados obtidos, se determinaran as actuacións a seguir”.
O portavoz popular do Mar, Miguel Fidalgo, afirmou que “a responsabilidade das verteduras recorrentes que se están a producir na contorna da Ribeiriña na Pobra do Caramiñal é do Concello e da Dirección Xeral de Costas do Goberno de España, así como da empresa TRAGSA, que foi quen fixo a obra”.
Engadiu que “o cuatripartito de esquerdas que goberna A Pobra fixo a obra sen descontaminar o chan de La Onza de Oro, como era a súa obriga e, nunha obra que custou tres millóns de euros, nin sequera deixaron luces no paseo”.
Como lembraremos, o BNG e o PSdG levan tempo manifestando xustamente o contrario respecto das verteduras: que a eliminación dos vertidos e ampliar a recuperación ambiental litoral da zona da Ribeiriña é responsabilidade do Goberno galego.
