O Executivo de Julián Bustelo levará ao Pleno un proxecto para a remodelación do paseo marítimo entre o Castelo da Lúa e a praia da Torre. Segundo informou o equipo de Goberno local, o obxectivo é “executar unha serie de actuacións que teñen por finalidade a mellora e acondicionamento do entorno do castelo, a mellora da accesibilidade ao mesmo dende o paseo marítimo que discorre ao seu carón, así como a optimizar a divulgación dos valores culturais, históricos, arqueolóxicos e arquitectónicos que lle son propios”.
O proxecto inclúe a renovación do firme do paseo marítimo nese treito, a renovación do mobiliario urbano, a rehabilitación da pasarela existente sobre o río Te e a creación dunha zona de ocio infantil a carón da praia da Torre.
No seu conxunto as diferentes actuacións previstas no proxecto acadan un investimento de 190.000€.
