Nesta semana, o 14 e 15 de maio, Boiro acollía a súa Feira de Emprego, un encontro que xuntou a profesionais, emprendedores e estudantes no Viveiro de Empresas de Boiro e no que participou de xeito salientábel a Asociación Boirense de Empresas (ABE). O evento serviu para reflectir o bo estado no que se atopa o tecido empresarial local e a importancia da colaboración entre institucións e empresas para fomentar o emprego, a formación e o autoemprego na comarca.
Entre as actividades levadas a cabo nestas xornadas, cómpre subliñar unha mesa redonda organizada pola ABE: Creando o mañá: Como converterte no propietario da túa empresa, que contou cunha gran asistencia de público que encheu o auditorio.
O acto foi presentado e moderado por Tomás Estévez, xerente da ABE, quen fixo fincapé en que “emprender non é cuestión de sorte, senón de traballo, perseveranza e apoio mutuo”. Ao longo da mesa, foron protagonistas catro empresas asociadas á entidade, que compartiron as súas historias de emprendemento: Carla Madrid, fundadora de Carla Madrid Cakes and Macarons, relatou como a súa paixón pola repostería e a creatividade a levaron a dar o salto como emprendedora. “Enfrontarse ao reto de emprender foi unha experiencia de aprendizaxe continua”, comentou, sinalando as dificultades para conciliar a vida familiar e profesional.
Pola súa banda, Luís Miranda Sueiro, director de finanzas e administración de Logística Sueiro Trans S.L., expuxo como a súa empresa familiar afrontou o desafío de modernizarse sen perder os valores de sempre. “O máis complicado non é moverse nun gran mercado, senón xestionar unha pequena empresa con recursos limitados; a formación e a profesionalización son imprescindíbeis”, afirmou, destacando as dificultades específicas das pequenas empresas.
Gerardo Triñanes, propietario de Asteleiros Triñanes Domínguez S.L., compartiu a súa experiencia persoal na empresa familiar despois de tentar emprender de xeito independente. “As trabas burocráticas seguen a ser un dos principais obstáculos para os pequenos empresarios”, sinalou, reclamando unha administración máis áxil e próxima.
Daniel García, propietario de Baldani Concept Store e presidente da ABE, contou a súa evolución desde os mercadiños até consolidar a súa propia tenda, resaltando a puxanza do sector cultural e social en Boiro. “Emprender aquí é un reto, pero tamén unha gran oportunidade. A ABE ten que seguir sendo un motor que impulse proxectos e xere emprego”, declarou.
O moderador, Tomás Estévez, puxo en valor estas experiencias como exemplo da capacidade de superación e do compromiso coa economía local: “Son persoas como elas as que fan medrar Boiro día a día, con esforzo, ilusión e constancia”.
Alén desta mesa redonda, a ABE colaborou activamente co evento entregando 200 bolsas de algodón orgánico como agasallo aos asistentes, reafirmando así o seu compromiso coa sostibilidade e o comercio de proximidade. Asemade, patrocinou o premio de 100 € en Bonos ABE, sorteado entre as persoas participantes nos distintos obradoiros da feira. A premiada foi Jessica Estévez Taboada, quen recibiu o galardón da man de Daniel García, presidente da ABE.
As empresas asociadas tamén tiveron visibilidade durante toda a xornada mediante a publicación das súas ofertas de emprego nas pantallas do evento, facilitando a conexión entre empresas e persoas en busca de novas oportunidades laborais.
Para rematar, a ABE valorou de maneira positiva esta edición da Feira de Emprego, que contou con máis de 200 persoas inscritas nos diferentes obradoiros, consolidándose como punto de encontro para fomentar o autoemprego e dar visibilidade ao tecido empresarial local. Dende a entidade salientaron a boa organización do Concello de Boiro e o traballo dos orientadores laborais, así como o compromiso das empresas participantes. A Asociación reafirma o seu obxectivo de continuar impulsando accións deste tipo e anima ás persoas emprendedoras a achegarse á ABE, onde dispoñen dun servizo de asesoramento inicial para apoiar a creación de novos proxectos empresariais.
