Este 24 de maio vaise celebrar en Esteiro (Muro) unha homenaxe a Xosé Manuel Saborido Núñez, Fino, polo seu “incansábel labor polo impulso do remo en Esteiro e para conseguir, co seu traballo, que as rapazas e rapaces da localidade puideran desfrutar deste deporte nas mellores condicións”.
En concreto, este sábado está previsto que se leve a acto o acto oficial de nomeamento das instalacións (a sede da Asociación Deportiva Esteirana de Remo) que levarán oficialmente o nome de Xosé Manuel Saborido Núñez, Fino.
Cómpre lembrar que o pasado mes de marzo o Concello de Muros aprobou por unanimidade unha proposta da Asociación Deportiva Esteirana de Remo para que as súas instalacións leven o nome dun dos seus principais impulsores, Xosé Manuel Saborido.
Fino foi o principal responsábel da entidade dende a súa fundación no verán de 1988 até o 2015, ano no que deixou a súa presidencia. A proposta estivo fundamentada “no inconmensurábel labor desenvolvido durante case tres décadas á fronte da asociación, nos logros acadados pola entidade nesa etapa, non só deportivos, e sobre todo na pegada que deixou ese traballo en varias xeracións de deportistas do concello de Muros”.
