A Asociación Boirense de Empresas (ABE) vén de rematar con éxito a súa campaña do Día da Nai, cunha ampla participación dos clientes. En total, rexistráronse 2.280 tíckets de compra a través da web da patronal boirense, nunha iniciativa que buscaba premiar ás persoas que apostan polo comercio local. No sorteo celebrado este luns 5 de maio, foron seleccionadas as 6 persoas gañadoras das Caixas Benestar, un premio composto por produtos de coidado persoal e unha caixa de Bonos ABE para gastar en negocios asociados dos sectores de salóns de peiteados, estética, podoloxía, masaxes, farmacia, odontoloxía, herboristería, droguería e outros servizos de benestar.
As persoas premiadas foron:
Lucía Pérez , por unha compra en Punto de Fuga
Miguel Rodríguez, por unha compra en Sheyla Figueroa
Nuria Gómez, por unha compra en Hipermarket Haomai
Lupe, por unha compra en Carnicería J.M. Boga
Hugo Collazo, por unha compra en Xoiería Teixeira
Lucía Rodríguez, por unha compra en Lisvaz
Este ano, como novidade, a ABE incorporou o Selo ABE á campaña, un distintivo que garante que todos os produtos e servizos das caixas proceden de empresas locais asociadas ou da Praza de Abastos de Boiro. “É unha forma de visibilizar que, en cada campaña, os premios tamén repercuten positivamente no noso tecido empresarial”, destaca o presidente da asociación, Daniel García.
A campaña estivo activa entre o 16 de abril e o 4 de maio, coincidindo co período de compras para o Día da Nai. Desde a ABE fan unha valoración moi positiva da resposta da clientela e agradecen “a confianza da veciñanza e o compromiso dos negocios participantes, que fan posible este tipo de iniciativas de dinamización local”.
