Este xoves 10 de abril celebrarase ás 20.30 horas unha nova edición do evento Fálame Sempre, o encontro anual organizado pola patronal boirense (ABE) e no que colabora o Concello de Boiro no que se explora a creatividade como ferramenta de innovación e crecemento empresarial. O evento, que chega xa á súa 11ª edición, seguirá o dinámico formato Pecha Kucha, no que cada participante disporá de menos de sete minutos para compartir a súa experiencia e ideas.
A sesión desenvolverase no salón de actos da asociación, cunha capacidade para preto de 100 persoas (aforo completo) e culminará cun pequeno aperitivo para fomentar o networking entre asistentes e participantes.
Empresas participantes
Nesta edición, contaremos coa presenza de cinco proxectos que compartirán o seu enfoque sobre a creatividade e a innovación nos seus respectivos sectores:
· Xoán Silva – A Goleta. Nacido e criado no mar en Rianxo, Xoan Silva fixo do mar a súa vida. Desde pequeno aprendeu a navegar seguindo o vento que empuxaba a dorna do seu avó. Traballou en bateas, cultivando mexillóns, e tamén creando experiencias mariñas para visitantes. Hai catro anos decidiu apostar polo seu propio proxecto, combinando navegación e formación en actividades mariñas. Ademais, é condutor de camións e participou nas dúas últimas edicións do Rally Dakar, experiencia que lle permitiu levar o seu espírito aventureiro máis aló do mar.
· Yoli Suárez – Profesional da produción audiovisual, actualmente traballa como axudante de produción no programa de TVE La Revuelta. Con ampla experiencia no sector cultural, especialízase na organización de eventos, xestión de proxectos audiovisuais e coordinación de equipos creativos.
· Luisa Bravo – LB Equipo Estético. Un equipo de profesionais da estética avanzada que aposta pola innovación en técnicas de coidado persoal e benestar. A súa filosofía baséase en tratamentos personalizados e tecnoloxía de vangarda para ofrecer resultados adaptados a cada cliente.
· Eva Guzmán / Fernando Rodríguez – O Secadeiro. Restaurante situado en Outes, especializado en gastronomía tradicional galega con toques de innovación. A súa proposta céntrase en produtos de proximidade, potenciando os sabores autóctonos e reinterpretando receitas clásicas con técnicas actuais.
· Antón Fonseca – Terras Gauda. Unha das adegas máis recoñecidas de Galicia, pioneira en innovación vitivinícola e desenvolvemento de novos produtos. A súa aposta pola investigación e o uso de técnicas avanzadas de viticultura permitiulle posicionarse como un referente no sector a nivel internacional.
Un evento consolidado no ecosistema empresarial
A ABE lembra que ao longo das súas dez edicións anteriores Fálame Sempre “converteuse nun referente para profesionais e emprendedores xa que o seu formato áxil e inspirador facilita a conexión entre diferentes sectores e fomenta o intercambio de ideas”.
A asistencia ao evento é de balde ata completar aforo. Para máis información e inscricións, pódese contactar coa organización a través do correo info@abe.gal.
