Baixo a premisa da chegada do tempo e de que a primavera adoita ser unha boa oportunidade para comezar a coidarnos, a Piscina Municipal de Rianxo, a través da empresa concesionaria do servizo, BeOne Rianxo, lanzou unha campaña para animar á cidadanía a poñerse en forma de cara ao verán, a campaña Eu, Gym, Xa!, unha iniciativa que “cun claim simpático e directo, convídanos a activarnos e aproveitar o momento idóneo para iniciar ou retomar a actividade física”.
O centro deportivo propón dous plans diferenciados, deseñados para facilitar ese primeiro paso e adaptarse ás preferencias de cada persoa. O plan Ao teu ritmo ofrece matrícula gratuíta para quen queira facer exercicio pola súa conta. Por outra banda, o plan Axudámoste está dirixido a quen busca unha orientación máis completa dende o inicio, incluíndo asesoramento deportivo e nutricional. Ademais, as familias poden beneficiarse de tarifas especiais que inclúen acceso a ludoteca, escolas de natación, campamentos e un amplo programa de actividades infantís dispoñibles durante todo o ano.
BeOne Rianxo lembra que ofrece múltiples espazos para a práctica deportiva, adaptados a distintos obxectivos e niveis. “Dispoñemos dunha ampla sala de fitness equipada con maquinaria de última xeración e distribuída en áreas específicas para traballo cardiovascular, forza, adestramento funcional e estiramentos; e ademais, contamos cunha variada oferta de actividades dirixidas, que inclúe disciplinas como ioga, zumba, pilates, tonificación e ciclo indoor, entre outras”, sinalan, engadindo que o centro dispón tamén de dúas piscinas (unha para nado libre e outra para fitness acuático), spa, solario, pavillón polideportivo, pistas de pádel, zonas exteriores e aparcadoiro.
As persoas interesadas poden acceder a tres días de proba gratuítos a través da web de Beone. Durante ese período poderán coñecer o centro, participar nas actividades e valorar a opción que mellor se adapte ás súas necesidades. Tamén poden escoller directamente o seu plan e comezar a adestrar dende o primeiro día.
