O Teatro Colón da Coruña acollerá, o próximo 10 de abril ás 19.00 horas, a celebración da IV Gala da Cultura da Deputación, na que se fará entrega dos premios convocados pola área de cultura da entidade provincial no 2024: o Torrente Ballester de Narrativa; o Castelao de Banda Deseñada; o Raíña Lupa de Literatura infantil e xuvenil; o González Garcés de Poesía; o Antonio Fraguas de Artesanía; o Fran Pérez ‘Narf’ de música; o Begoña Caamaño á acción cultural pola igualdade de xénero; o Jesús Núñez de Arte Gráfica e o Luís Ksado de fotografía. A entrada é libre ata completar aforo.
A reinterpretación da tradición ou o novo tradi será o fío condutor dunha gala presentada pola xornalista Susana Pedreira, que contará coas actuacións do trío musical Alana e o bailarín e coreógrafo ribeirán Fran Sieira e que terá tamén interpretación en lingua de signos. Ademais, o encaixe de Camariñas será protagonista, como “símbolo da nosa tradición, artesanía e identidade”, explicou a deputada, en toda a estética.
“Vai ser unha xornada moi diversa, dinámica e emotiva. Como o é a nosa cultura. Porque a cultura é transversal: é identidade, patrimonio e transformación social” sinalou a deputada. Baixo esta premisa, xorden diferentes colaboracións. En primeiro lugar, coa propia Mostra do Encaixe, que estarán palillando nas inmediacións do Teatro xusto antes da gala e, ademais, un dos seus deseñadores, Jose Matteos, será o encargado do vestiario da presentadora, Susana Pedreira. Tamén con La Mapache que deseñarán o vestiario de Alana, e coa cineasta Nela Fraga, que creará unha peza audiovisual a partir de imaxes do Arquivo do Patrimonio Oral da Identidade do Museo do Pobo Galego. Os premios son obra, unha vez máis, da escultora Soledad Penalta.
Natividade González destacou que “queremos premiar o traballo dos nosos creadores e creadoras, celebrar que somos un país vivo, alegre e con moito talento, e que a nosa cultura está nun momento de gran relevancia internacional”.
A directora artística, Thais Suárez, explicou que a gala “renderá homenaxe ás creadoras e creadores, enriquecendo a cultura cunha mirada contemporánea”.
Pola súa banda, a xornalista Susana Pedreira salientou a “ilusión de presentar uns certames moi importantes para a cultura galega, por ser motor, alento e creación”.
A moda estará moi presente, xa que o vestiario de Alana correrá a cargo de La Mapache, que traballarán “neste concepto de novo tradi” creando as pezas a medida “inspirándonos no traxe tradicional galego, sobre todo nos cortes”. E usando, para o estampado “o gatipedro de Cunqueiro”.
Alana e Fran Sieira serán os encargados de dinamizar a gala coas súas actuacións, nunha xornada “na que haberá moitas sorpresas” tal e como adiantaron, engadindo que “achegaremos cousas que nunca fixemos”. Os integrantes de Alana agradeceron á Deputación a aposta “polos novos talentos” e tamén “ese lazo de unión e a comunidade que se crea entre nós”.
