A Asociación Rianxeira de Empresarios (ARE) activou esta semana unha nova campaña para reivindicar o comercio e a hostalería locais ao tempo que se celebra a chegada da primavera: Premi-ARE. A iniciativa, que culmina este venres 25, destaca as importantes vantaxes de mercar e consumir en clave de proximidade e destaca o papel esencial do comercio e a hostalería de Rianxo para a actividade económica e social do concello.
A campaña inclúe un panel Premi-ARE no Paseo da Ribeira (18:00 – 21:00 h), onde teremos que presentar un tícket de compra realizado entre o 21 e o 25 de abril nun dos establecementos asociados á ARE e escoller unha flor do panel para descubrir o teu premio directo. Poderemos gañar mochilas, botellas reutilizábeis, bolsas ecolóxicas ou vales de compra para seguir apoiando os negocios locais.
Tamén haberá sorpresas nos establecementos asociados: durante todo o día do 25 de abril, os comercios participantes sorprenderán á súa clientela con agasallos, descontos especiais e accións únicas como mostra de agradecemento pola confianza depositada durante todo o ano.
Asemade, achegaranse actividades para toda a familia:
• Inchábeis @infantilandia.eventos nos Xardíns da Martela (17:00 – 20:00 h)
• Espectáculo do Mago @antonnoriega.magia no Campo de Arriba (20:15 – 21:15 h)
“Queremos invitar a toda a veciñanza de Rianxo a mercar no comercio local e participar na campaña”, sinalan dende a ARE, engadindo que “cada compra que fas nos nosos negocios axuda a fortalecer a economía da vila, a manter vivo o tecido comercial e a construír un futuro con máis oportunidades para todos e todas. Agardámoste este 25 de abril para celebrar xuntos a primavera, apoiar os negocios locais e desfrutar dunha xornada chea de vida, cor e ilusión”.
