O domingo 23 de marzo o Coliseo Noela acollerá ás 20.00 horas o musical Odisea a través do tempo, unha proposta organizada polo IES Virxe do Mar, o Conservatorio Municipal, a Escola de Danza Oitos, e o Concello de Noia que salienta o “gran valor pedagóxico e social do proxecto que deu forma ao espectáculo, encadrado na celebración do Día Mundial da Auga e avalado polo patrocinio da Comisión Nacional Española da UNESCO”.
A función, cuxas entradas (de balde) poden conseguirse a través do documento en liña habilitado, contou coa colaboración activa da rapazada do IES Virxe do Mar e máis do Conservatorio de Noia, que se encargaron da coordinación do festival e, tamén, das diferentes vertentes artísticas do mesmo: teatro, escenografía, coro, iluminación, música (Conservatorio) e coreografía (Escola de Danza Oitos).
A obra está encadrada nos proxectos eCO2Rivers de Erasmus+ e a Cinco Climas entre os Ríos e os Barrancos do Cambio Climático da Secretaría de Estado de Educación, que coordina o IES Virxe do Mar. Con ela o centro educativo celebrou o Día Mundial da Auga.
A cita contará cunha ampla representación dos centros educativos participantes, e con conferencias a cargo de Anxo Carracedo, catedrático de Medicina Legal da USC e director da Fundación Pública galega de Medicina Xenómica, e de María Xosé Silvar (Sés), filóloga, antropóloga social e cantautora galega.
Anxo Carracedo achegará o relatorio Xenes e cambio climático e Sés Unha visión do musical Odisea a través do tempo e dende a antropoloxía social.
