A conselleira de Economía e Industria, María Jesús Lorenzana, reuniuse este venres 21 de marzo coa Asociación de Empresarios de Ribeira, para abordar a celebración da VI Feira do Automóbil Híbrido & Eléctrico que recolle cada ano o municipio ribeirense. No encontro, a conselleira puxo en valor este tipo de iniciativas e insistiu na importancia da mobilidade eficiente e sustentábel, “que é un dos sete eixes da Axenda Enerxética de Galicia 2030 con accións encamiñadas ao fomento do uso de fontes de enerxía renovábel no transporte, o fomento do vehículo eléctrico ou a promoción dunha mobilidade respectuosa co medio ambiente”, sinalou.
A Feira do Automóbil Híbrido e Eléctrico da patronal ribeirá xunta cada verán as principais marcas do sector coas súas grandes novidades en materia de nova mobilidade. Na última edición, celebrada entre o 14 e o 16 de xuño, participaron as seguintes marcas (un total de catorce): Opel, Jeep, Fiat, Citroën, Peugeot, Audi, BMW, Toyota (Compostela Móvil), Lexus (que se incorpora por vez primeira na Feira ribeirense), Mercedes, Kia, Skoda, Ford e Hyundai.
Segundo explicou a asociación, a feira é unha oportunidade inmellorábel para coñecer as grandes novidades do sector e os máis relevantes lanzamentos actuais e futuros das principais marcas do motor. “Todo indica a que o parque deste tipo de vehículos híbridos e eléctricos nas nosas vilas e cidades será maioritario nos próximos anos, polo que unha vez máis queremos achegar á cidadanía unha canle directa a estes vehículos, coa posibilidades de coñecer de primeira man todos os seus detalles”, indicou a patronal.
