Finalmente e tal e como se se supuña, prosperou en Outes a moción de censura impulsada polo PP co apoio de até o de agora responsábel local do PSOE, Antonio Caamaño, integrante do equipo de Goberno local até este inicio de ano e na actualidade expulsado do seu partido tras ser declarado concelleiro tránsfuga. Trala aprobación da moción no pleno do mediodía deste 25 de febreiro, Francisco Calo, do PP, é xa o novo alcalde do Concello de Outes. Na sesión Tono Caamaño foi recibido con apupos de “traidor” por parte da veciñanza.
No pleno, ao que asistiron un centenar de veciños e veciñas, non serviron de nada as probas irrefutábeis do até o de agora equipo de Goberno (formado por Compromiso por Outes e BNG) nas que se desmentían os argumentos de suposta inacción achegados polo PP e o PSOE para facer caer o Goberno de Manolo González. Este recriminou o papel xogado por Antonio Caamaño “polo espectáculo ofrecido por unha parte da corporación que remata con esta legal pero infame moción de censura”.
Pola súa banda, o novo alcalde, Francisco Calo, criticou ao Goberno saínte pola situación actual do Concello, “gobernado por un alcalde que non contaba co apoio da Corporación”. Isto, dixo, só podía levar a Outes “á inoperancia e á inestabilidade”.
Anxo Núñez, até o de agora tenente de alcalde e voceiro do BNG, sinalou os días pasados que esta moción de censura demostra ás claras que “o único que demostran dende o PP é que lles vale calquera cousa para chegar á alcaldía, se non lles chegan os votos de dereitas, mercan os dos que votaron ó PSOE”.
