O Concello de Boiro recolleu no ano 2024 un total de 42.785 quilos de roupa mediante o servizo de recollida que se leva a cabo xunto con Cáritas de Santiago cos contedores instalados en diversos puntos do termo municipal.
O servizo de recollida de roupa comezou en Boiro no ano 2020 logo da sinatura dun convenio de colaboración entre o Concello de Boiro e Cáritas Diocesana de Santiago de Compostela para a colocación de contedores coa finalidade de recoller e tratar o residuo téxtil. Nun primeiro momento habilitáronse cinco recipientes que, debido á gran acollida, incrementáronse ata os seis dos que se dispón na actualidade instalados na praza da Mancomunidade, na Igrexa de Santa Baia de Boiro, na rúa Principal e na estrada xeral de Cabo de Cruz e Escarabotiño.
En canto á rastrexabilidade dos residuos recibidos, un 50% dos mesmos son roupa e calzado reutilizábel e un 38% de reciclaxe, aquela roupa ou calzado non reutilizábel pero que se pode transformar para volver a usar. A recollida deste ano supón un incremento co recollido no ano 2023, que foi de 39.374 quilos.
Todo o material recollido nos colectores instalados é trasladado á planta da que dispón a empresa xestora para a súa clasificación segundo o destino final. Aqueles residuos que non poden ser reusados son tratados cun xestor integral de residuos para a súa reciclaxe e a reutilizábel clasificase.
