O Centro de Interpretación do Castro de Baroña acolleu o pasado venres, 24 de xaneiro, a xuntanza de constitución da Mesa Local de Coordinación Institucional contra a Violencia de Xénero, dirixida por Exeria Proxecto.
Dita mesa, na que se traballa para perfilar o protocolo de intervención municipal do Concello de Porto do Son en casos de Vioxen, constitúe unha ferramenta operativa na que están representados todos os ámbitos municipais: político, social, sanitario, educativo, corpos e forzas de seguridade, así como tamén outros axentes implicados, directa ou indirectamente, na loita contra as agresións machistas, co obxecto de procurar unha maior eficiencia de todas as actuacións a tal fin.
O Concello explicou que a súa natureza interinstitucional “facilita o desenvolvemento de dinámicas cooperativas e o establecemento de redes de colaboración entre as diferentes institucións e colectivos sociais que interveñen no territorio”.
O grupo constitucional foi citado para unha vindeira reunión, o 4 de abril, na que seguir abordando a vixente temática principal.
