A conselleira do Medio Rural, María José Gómez, acompañada pola directora xeral da Axencia Galega de Desenvolvemento Rural, Paz Rodríguez, visitou este xoves 5 de decembro en Outes o restaurante O Secadeiro, galardoado cunha Estrela Verde Michelín e que, segundo lembraron, comezou a súa actividade cunha axuda de preto de 50.000 euros a través do programa Leader.
A conselleira engadiu que o recente premio a este establecemento fundamentouse no “especial compromiso coa sustentabilidade” a través da cociña, valorando o feito de que o 80% das súas elaboracións levan ingredientes de quilómetro cero, ao contar con horta e invernadoiro propios.
Gómez puxo en valor esta aposta polos produtos de proximidade e salientou o impulso dinamizador que representa este negocio de hostalería para a contorna, trasladando os seus parabén aos chefs Eva Guzmán e Fernando Rodríguez por facer da sustentabilidade unha das bandeiras do seu traballo.
A titular de Medio Rural engadiu que iniciativas como O Secadeiro “constatan que o medio rural é unha aposta de futuro que ofrece múltiples alternativas emprendedoras de éxito”.
Neste marco, a titular de Medio Rural lembrou que no último período deste programa aprobáronse 1.495 proxectos, o que permitiu crear un total de 933 postos de traballo e consolidar outros 3.256 no conxunto de Galicia.
Todo este labor, sinalou a conselleira, ten continuidade no marco do Plan Estratéxico da Política Agraria Común (Pepac) 2023-2027, cun orzamento de preto de 57 millóns de euros, dos cales case 18 millóns se destinarán aos gastos de funcionamento dos GDR e os arredor de 39 restantes para apoiar diferentes proxectos dinamizadores no rural galego.
