Os socialistas de Rianxo agradeceron “o compromiso da Deputación da Coruña co noso concello”, destacando a implementación dun novo modelo de residencia pública para as persoas maiores. Óscar Rial, portavoz do PSOE en Rianxo, recordou que en marzo de 2023 o partido xa expresara a necesidade de crear unha residencia que ofrecese unha atención integral e renovada.
O presidente da Deputación da Coruña, Valentín González Formoso, reuniuse recentemente con Rial para presentar os detalles do proxecto. Segundo explicaron, o novo modelo contará con menos prazas, pero ofrecerá unha atención máis personalizada, promovendo a innovación e a convivencia interxeracional. Este enfoque busca evitar o desarraigo que sofren as persoas maiores, ofrecendo espazos máis humanizados e próximos ao modelo aplicado nalgúns países do norte de Europa.
“Para Rianxo é unha satisfacción contar cunha residencia deste tipo. Os nosos maiores merecen a mellor atención, máis social e máis próxima”, afirmou Rial, quen destacou o carácter pioneiro e innovador do proxecto impulsado pola Deputación. O portavoz socialista tamén manifestou a súa disposición a colaborar no deseño e evolución da residencia, achegando ideas e suxestións desde o Partido Socialista.
