Na nova edición dos Premios Lux (coñecidos como “os Goya da fotografía profesional”) tiveron especial protagonismo os fotógrafos da nosa comarca. Se onte falamos do recoñecemento obtido por Adolfo Enriquez, de Porto do Son, hoxe temos que lembrar que no palmarés atópase tamén o rianxeiro Roberto Ouro Tubío, galardoado tamén no prestixioso certame. Foi na categoría de Paisaxe e Natureza, onde obtivo o Premio Lux Bronce.
O fotógrafo Roberto Ouro Tubío, despois de estar nomeado aos premios FEPFI e ser gañador dun premio Luces de Granada, foi galardoado este xoves 7 de novembro nos Premios LUX de Fotografía Profesional 2024, celebrados en Barcelona, cun bronce na categoría de paisaxe e natureza, pola obra O animal e a montaña.
Esta obra, en palabras de Roberto, “quere transmitir como esta cabra montesa supérase no día a día, sorteando unha chea de obstáculos para alimentarse e sobrevivir”. Nesta ocasión o animal ha de baterse nun enfrontamento directo coa mesma montaña.
O Premio LUX bronce, outorgado pola Asociación de Fotógrafos Profesionais de España (AFPE), celebra a excelencia na fotografía profesional e destaca a aqueles que demostraron un nivel excepcional de creatividade e destreza no seu traballo.
“Este premio é un gran paso para a miña carreira profesional, é un recoñecemento ao esforzo
por sempre tentar ser creativo e achegar un punto de vista diferente”, sinalou o fotógrafo rianxeiro.
Sobre os Premios LUX de Fotografía Profesional
A Asociación de Fotógrafos Profesionais de España creou en 1993 os Premios LUX que se posicionaron como o referente da fotografía profesional en España. O seu propósito é dar visibilidade, recoñecemento e prestixio a esta arte, e manter viva a ilusión dos fotógrafos e as fotógrafas profesionais que se presentan cada ano. O prestixio dos Premios LUX vén apoiado pola enorme calidade dos traballos presentados, pero tamén por un xurado que se renova ano tras ano e está integrado por recoñecidos profesionais do sector da imaxe e a comunicación.
