O fotógrafo sonense, Adolfo Enríquez, foi galardoado nos Premios LUX de Fotografía Profesional 2024, celebrados no Disseny Hub Barcelona o 7 de novembro, cun Prata na categoría de paisaxe-natureza, pola obra “Lux”.
Nesta obra de Enríquez, plasma un amencer cos primeiros raios de sol abríndose paso a través da néboa e filtrados polas árbores na rivera do río Douro na localidade portuguesa de Peso de Régua. A visibilidade destes raios do Sol é debida a que as partículas de auga da néboa son capaces de dispersar a luz, e deixan ver eses raios de luz tan espectaculares, este fenómeno coñécese como efecto Tyndall.
“Hai moitos anos que as miñas imaxes forman parte de libros e revistas dedicadas á promoción da paisaxe e a natureza de Galicia, este premio precisamente na categoría de paisaxe é un impulso para seguir fotografando a beleza que se esconde en cada recuncho do noso país”, declara Adolfo Enríquez.
Sobre os Premios Premios LUX:
A Asociación de Fotógrafos Profesionais de España creou en 1993 os Premios LUX que se posicionaron como o referente da fotografía profesional en España. O seu propósito é dar visibilidade, recoñecemento e prestixio a esta arte, e manter viva a ilusión dos fotógrafos e as fotógrafas profesionais que se presentan cada ano.
O prestixio dos Premios LUX vén apoiado pola enorme calidade dos traballos presentados, pero tamén por un xurado que se renova ano tras ano e está integrado por recoñecidos profesionais do sector da imaxe e a comunicación.
