O Concello do Porto do Son recibiu este 21 de outubro a súa sexta Bandeira Verde de Galicia, un recoñecemento ao compromiso municipal coa protección da paisaxe, a conservación do patrimonio natural e o coidado do medio ambiente.
A tenente de alcalde, María José Maroñas, acompañada polo concelleiro de Medio Ambiente e Medio Rural, Juan José Calo, recolleu o distintivo nun acto celebrado en Vedra, que contou coa participación da conselleira de Medio Ambiente e Cambio Climático, Ángeles Vázquez.
Segundo fixeron saber Maroñas e Calo, para o Concello do Son “a concesión desta sexta Bandeira Verde constitúe un novo recoñecemento ao labor desenvolvido polo Goberno sonense neste ámbito e reforza o seu compromiso coa conservación da contorna natural e coa promoción dun modelo de desenvolvemento máis sostíbel”.
Maroñas destacou “o traballo realizado polo Goberno dirixido por José Luis Oujo na protección do patrimonio natural e paisaxístico e para avanzar cara a un territorio máis respectuoso co medio ambiente e coa calidade de vida da veciñanza”.
A Bandeira Verde de Galicia ten como obxectivo distinguir e dar visibilidade ás administracións locais que impulsan boas prácticas relacionadas coa ordenación do territorio, a protección ambiental e paisaxística, a loita contra o cambio climático, a eficiencia enerxética, a xestión responsable dos residuos e a sensibilización cidadá.
Nesta mesma convocatoria, a Xunta de Galicia concedeu un total de 39 Bandeiras Verdes a outros tantos concellos, seis máis que en 2025.
