Este mes de novembro regresa o deporte solidario a Porto do Son, pero a diferenza de acontecementos recentes que poñen o foco no sendeirismo ou no running, desta volta a natación será a protagonista indiscutíbel. A actividade deportiva 100×100 terá o seu epicentro na Piscina Municipal de Porto do Son e xuntará deporte, convivencia e solidariedade. A través dela, varios equipos terán o obxectivo de nadar un total de 10.000 metros cada un. Ao mesmo tentarase recadar o máximo número de produtos de hixiene, aseo e limpeza, material que será doado logo á Cruz Vermella de Noia. A recollida solidaria estará aberta a toda a veciñanza (local e comarcal) durante a semana comprendida entre o 18 e o 23 de novembro. O 23 de novembro dará comezo a competición de natación solidaria na que varios equipos -masculinos, femininos ou mixtos dende infantil ata máster- terán o obxectivo de nadar un total de 10.000 metros cada un. Máis inforamción na Concellería de Deportes de Porto do Son a través do teléfono 981 76 75 89 ou a conta de correo deportesdoson@gmail.com. Tamén podemos chamar ao teléfono da Piscina Municipal, 604051189.
