A Casa da Cultura de Portosín acolle estes días a exposición Un paseo pola contorna, que poderemos visitar até o 30 de setembro na sala de exposicións do dito inmóbel. Trátase dunha exposición de acuarelas de Beatriz F. Ferrín (Augarela) que xa se puido contemplar previamente na Casa da Cultura de Porto do Son.
Beatriz Ferrín é unha artista local autodidacta que destaca pola calidade de súa técnica no formato das acuarelas. Os seus traballos están inspirados na súa maioría no municipio mariñeiro e inclúen homenaxes á arquitectura local, ás súas xentes e á súa impoñente paisaxe marítima. Ferrín mostra o seu talento nas redes sociais a través da súa firma, Augarela.
