Este domingo 8 de setembro celebrouse en Porto do Son a procesión grande das Festas do Carme. Participaron, entre outras autoridades, o conselleiro do Mar, Alfonso Vilares, o arcebispo de Santiago, monseñor Francisco José Prieto, o alcalde Luis Oujo, e os patróns maiores de Porto do Son e de Portosín, Emilio Queiruga e Isaac Gaciño, que quixeron acompañar os asistentes neste festexo no que se homenaxea á patroa dos mariñeiros e a todas as persoas que traballan ou se relacionan co mar.
Villares expresou o seu agradecemento por facelo partícipe deste encontro e trasladou tanto a súa vontade, como a da Consellería que dirixe, para seguir apoiando o sector, aos pobos nos que a pesca é un dos elementos que sustentan a súa economía e a todas as familias que buscan neste medio a ilusión do seu futuro.
Este domingo é o día grande das festas, sendo a xornada adicada a honrar á Virxe do Carme. Logo das dianas e alboradas de Canlebó, comezou ás 10.30 horas a procesión dende a capela da Atalaia até a explanada portuaria onde se celebrou a misa solemne ás 11.00 horas, presidida polo monseñor Francisco José Prieto, arcebispo de Santiago de Compostela e acompañada pola Banda de Música de Noia. Ao rematar a misa foi a quenda da procesión marítima coa tradicional ofrenda floral polos mariñeiros falecidos no mar, finalizando coa tirada de fogos artificiais. Pola noite, ás 22h, actuará na praza de España Xurxo Fernandes. A verbena correrá a cargo das orquestras Claxxon e New York.
O luns 9 de setembro, día adicado á Virxe do Loreto, arrincará novamente con dianas e alboradas a cargo do grupo de gaitas Canlebó, e logo haberá misas na capela do Loreto cada hora entre as 8.00 e as 12.00, culminando ás 13.00 horas cunha misa solemne acompañada da Banda de Música de Caamaño. Logo celebrarase unha sardiñada no campamento de Loreto amenizado por Paco de Leña e pola tarde seguirán as misas na capela ás 18.00 e ás 19.00 horas. Pola noite actuarán na praza de España os noieses Monolious Dop, a orquestra Finisterre e máis Chocolate.
O martes 10, Día na Honra de San Roque, comezará coas dianas e alboradas de Canlebó e logo cunha misa solemne na capela da Atalaia, ás 12h e con posterior procesión acompañada da Banda de Música de Caamaño. Pola tarde haberá exhibición de taekwondo ás 20.00 horas na praza de España e pola noite verbena coas orquestras París de Noia e La Banda de Ayer.
O mércores 11, xornada adicada á Caridade, arrincará novamente coas dianas e alboradas de Canlebó e logo haberá unha misa solemne ás 12.00 na igrexa parroquial e posterior procesión acompañada pola Banda de Música de Caamaño. Pola tarde haberá inchábeis e xogos para nenos a partir das 17.00 horas no xardín portuario, e pola noite verbena coas orquestras Kubo, Marbella e Chocolate. Ás 0.00 botaranse os fogos de artificio e a continuación actuará a Charanga Os Celtas.
