Rescatada unha persoa que resultou ferida tras caer na fervenza Misarela, no concello da Pobra do Caramiñal

Os bombeiros do parque Comarcal Provincial de Boiro e de Ribeira participaron esta tarde no rescate dunha persoa que resultou ferida tras caer na fervenza Misarela, no río Pedras, no concello da Pobra do Caramiñal.Os efectivos colaboraron na evacuación da persoa, que foi trasladada ao Hospital Clínico Universitario de Santiago en helicóptero.

O 112 Galicia tivo constancia deste suceso logo do aviso dun particular cando estaban a piques de ser as 16:30 horas. Durante a súa chamada, o alertador explicou que unha muller caera sobre unhas pedras na Fervenza da Misarela, en Lesón, e non era capaz de erguerse de novo ao ferirse nunha perna.

Con esta información, desde o Centro Integrado de Atención ás Emerxencias 112 Galicia solicitouse a intervención dos Bombeiros de Boiro. O aviso tamén se pasou ao Servizo de Urxencias Sanitarias de Galicia-061, aos Bombeiros de Ribeira, á Garda Civil da Coruña, á Policía Local e á Agrupación de Voluntarios de Protección Civil da Pobra do Caramiñal.

Os Bombeiros de Boiro lograron chegar ata a persoa, que se atopaba estable e consciente, aínda que sen poder andar. Debido a que o camiño estaba intransitable, a evacuación por terra antollábase difícil, polo que se solicitou a saída do helicóptero Pesca I do Servizo de Gardacostas de Galicia. Tamén foi notificado Salvamento Marítimo.

A ferida, xa cos Bombeiros tanto de Boiro como de Ribeira no punto, foi rescatada polo Pesca I e evacuada ata o hospital de referencia.