Porto do Son vai ser unha das paradas, este mes de agosto, da nova xira da familia de Os Bolechas (os personaxes creados por Pepe Carreiro) pola xeografía galega, presentando o espectáculo Radiolímpica 88 FM. A cita (a primeira da xira galega) será o vindeiro mércores 14 de agosto en Porto do Son, ás 21.00 horas na praza de España. Trátase dunha función para os máis pequenos á cal, segundo sinala o Concello, as e os maiores están tamén convidadas/os. Organiza a Secretaría Xeral de Lingua a través do programa FalaRedes coa colaboración do Concello de Porto do Son.
O espectáculo Radiolímpica 88 FM é unha sesión de monicreques ao aire libre que combina o teatro de monicreques con explicacións, preguntas e probas pensadas para que participen nenos e nenas de 4 a 9 anos e as súas familias. Nesta nova proposta combínanse, da man dos coñecidos personaxes de Pepe Carreiro, a lingua galega e o deporte, o xogo coa aprendizaxe. Con esta actividade, Carlos, Loli, Pili, Braulio, Sonia, Tatá e Chispa dan a coñecer diferentes disciplinas deportivas, co gallo da celebración das Olimpíadas en París. Os Bolechas deportistas anímanos a usar o galego tamén cando practicamos deporte.
