Esta fin de semana os afeccionados ao golf están de celebración coa décima convocatoria do prestixioso Torneo de Golf CONGALSA que se celebra no club Barbanza Golf de Boiro. Un evento deportivo que cada ano reúne a máis deportistas e que se converteu nunha cita de referencia no calendario de competicións. Deste xeito, os días 16, 17 e 18 de agosto os deportistas rexistrados poderán mostrar as súas habilidades no campo para facerse con algún dos trofeos das categorías Scratch, Hándicap, Sénior, Feminina e Júnior.
O domingo 18 a partir das 13.00 horas celebrarase a entrega de premios na que se sortearán agasallos entre todas as persoas participantes e degustaranse unha selección de produtos das diferentes gamas que comercializa a compañía.
Desta forma, volve unha cita deportiva impulsada pola firma pobrense CONGALSA coa que promove o deporte e que tamén serve de aliciente turístico e económico para a comarca do Barbanza.
As inscricións están abertas ata o xoves 15 ás 22.00 horas e pódense formalizar a través do correo electrónico barbanzagolf@gmail.com, na web golfdirecto.com, no teléfono 651172945 ou no campo de golf situado en Boiro.
