O CEIP Santa Irene de Porto do Son celebrou ao grande o Día Mundial do Medio Ambiente (5 de xuño). Fíxoo da man de Apigal produtora local de mel de montaña, con sede en Queiruga (Porto do Son), cuxos responsábeis ofreceron ao alumnado do CEIP unha charla de interese sobre produción de mel e sobre a importancia das abellas no medio natural, xa que son, de entre todos os insectos e outros seres vivos, os maiores polinizadores. Na cita coa rapazada de cuarto de Primario tamén falaron dos coidados das abellas, da súa alimentación, da maneira de organizarse e do seu modo de vida. Na celebración participaron os concelleiros de Medio Ambiente e Deportes e Xuventude de Porto do Son, Juan José Calo e Carlos Lorenzo.
Apigal iniciou a súa andaina no ano 2014, apostando forte pola calidade do produto na contorna da serra do Barbanza e pola innovación. A idea foi “crear unha empresa sostíbel, unha empresa que ademais de poder vivir do noso traballo no rural contribuíse a mellorar o medio ambiente e axudar ao planeta e a súa biodiversidade”.
Contan con páxina web dende onde comercializan o que producen e cunha propia marca de alimentos sustentábeis “sen ningún conservante e apostando só polo que a natureza nos brinda”.
