O concelleiro delegado de Sanidade de Ribeira, Juan Luis Furones, asistiu este mércores 3 de abril a unha xuntanza da FEGAMP na que participaron os trece Concellos que contan con Unidades Municipais de Asistencia á Drogodependencia (UMAD), para tratar a situación da integración da rede galega de trastornos aditivos no Servizo Galego de Saúde. Os trece Concellos que contan con Unidades Municipais de Asistencia á Drogodependencia (entre os que se conta o de Ribeira) e a Federación Galega de Municipios e Provincias (FEGAMP) rexeitaron a proposta recibida dende a Xunta para renovar o convenio dirixido a cubrir os custos deste servizo por parte destes concellos. Segundo fixo saber o edil ribeirense, “non se está a cumprir o mandato do Parlamento de marzo de 2021, que asume que as competencias sanitarias son do SERGAS. O financiamento das UMAD corre a cargo dos Concellos, a pesar de que isto afecta a tódolos galegos. Deberíase devolver a asistencia sanitaria a quen ten a competencia transferida”, dixo.
Nesta xuntanza avaliouse negativamente a proposta recibida dende a Xunta para o novo convenio, no que o importe contemplado no mesmo para a cobertura dos custos do servizo apenas supera os 4 millóns de euros anteriores, o que “supón un grao do cobertura de aproximadamente o 70% do gasto total que supoñen as UMAD”, sinalaron os Concellos, malia que, engadiron,”a propia Administración autonómica recoñece como competencia súa, pero finalmente teñen que volver a ser as administracións locais as que garantan o servizo achegando recursos propios”.
Para a FEGAMP e os ditos Concellos, a proposta de novo convenio “aínda empeora as condicións anteriores, xa que ademais de seguir sen cubrir o total do custo agora a Xunta de Galicia pretende diferir o pagamento en dous prazos condicionados”. Isto supón que os trece municipios con UMAD “non só terían que financiar boa parte dun servizo que é competencia autonómica, senón que tamén terían que esperar máis tempo e realizar dúas xustificacións para poder recibir a contía económica dende a Xunta de Galicia”, explicaron.
O presidente da FEGAMP e alcalde de Vilagarcía, Alberto Varela, considerou que “esta situación é moi grave, polo que emprazamos ao novo Goberno da Xunta de Galicia a cumprir cos compromisos adquiridos con urxencia para garantir a calidade do servizo que se presta”, e exixe “unha xuntanza co novo conselleiro de Sanidade en canto teña tomado posesión do seu cargo co fin de retomar a aplicación dos compromisos adquiridos no cronograma”.
