O Concello de Boiro colabora coa Asociación de persoas autistas BarbanTEA na celebración da Andaina do Autismo 2024 que está prevista para este domingo 7 de abril. Na presentación, que tivo lugar no Consistorio na mañá deste xoves 4, estiveron o concelleiro de Deportes, Marcos Fajardo, e Patricia Davila e Olga Moledo, da asociación.
Segundo fixeron saber, a andaina constará dun percorrido duns 6 quilómetros que sairá da praza de Galicia e percorrerá o paseo do río Breiro, o paseo marítimo de Barraña e o esteiro do río Coroño para volver á praza de Galicia onde haberá un avituallamento. “Para o Concello de Boiro é sempre un orgullo colaborar con iniciativas como esta que mesturan deporte e concienciación sobre algunha causa como é nesta ocasión o autismo”, recoñeceu o concelleiro Marcos Fajardo.
Pola súa banda, Patricia Davila sinalou que “a finalidade desta cita é dar a coñecer o autismo e traballar a integración destas persoas e darlle o seu espazo na sociedade”.
A andaina é gratuíta pero precisa de inscrición previa, que se pode facer na web www.barbantea.org
Olga Moledo agradeceu a colaboración da institución e das empresas que fan achegas para a celebración desta cita que “é so unha das actividades que queremos promover para mostrar que o autismo non é unha enfermidade, é unha condición”.
A Asociación BarbanTEA naceu este ano coa finalidade de axudar ás persoas autistas e ás súas familias e desenvolver accións que favorezan a integración destas persoas.
