O Museo de Pontevedra acolleu este xoves 7 de marzo a inauguración da da mostra Castelao: o retorno a Galicia: 1984. Organizada pola Deputación de Pontevedra, a exposición conta a historia dun dos momentos clave da Transición en Galicia: a chegada dos restos mortais do escritor, debuxante e político rianxeiro Alfonso Daniel Rodríguez Castelao a Santiago de Compostela en 1984. No acto participaron o conselleiro de Cultura, Román Rodríguez, e o presidente da entidade provincial, Luis López.
Rodríguez destacou “o papel fundamental que ten Castelao en Galicia, pioneiro no labor de unir lazos e por ser símbolo de concordia e unión de todos os galegos, ademais de ser o pensador e autor máis emblemático de Galicia ano século XX, pero tamén unha das figuras clave da evolución institucional e democrática galega”. E engadiu: “Falamos dun persoeiro que é parte do pobo galego e que representa as aspiracións últimas da nosa terra: liberdade, aperturismo, igualdade, solidariedade, conciliación, desenvolvemento e futuro”.
A mostra, comisariada por Xosé Enrique Acuña e conformada por 52 fotografías de Xan Carballa realizadas hai catro décadas, dá conta do lugar privilexiado que Castelao “ocupaba e ocupa no imaxinario popular galego como emblema da nosa fraternidade”, sinalou o titular de Cultura sobre ese acordo unánime de todas as forzas parlamentarias de traer a Galicia os restos mortais de Castelao.
Esta exposición, que estará dispoñíbel ata o 2 de xuño, enmárcase na celebración do 40 aniversario da volta dos restos mortais de Castelao desde Bos Aires. O 28 de xullo de 1984 foi a data na que regresaron a Galicia, polo que ao longo dos meses de verán, a Xunta e a Fundación Castelao queren recordar este acontecemento tan sinalado na historia da cultura galega.
Convite do presidente provincial
Pola súa banda, o presidente da Deputación de Pontevedra, Luis López, animou á cidadanía a visitar a exposición para “valorar o avance e a convivencia da sociedade galega” e coa que o Museo de Pontevedra inicia o programa expositivo do ano 2024. “Desde este edificio que leva o seu nome reafirmamos a nosa vocación de tender pontes con todos e para todos; coas raíces de Castelao e a provincia do futuro, con todos os sectores sociais, todos os territorios e todos os cidadáns porque na construción dunha terra mellor non sobra ninguén”, afirmou Luis López.
