A Casa da Cultura de Xuño e o Local Náutico de Porto do Son acolleron este mes de febreiro cadansúas charlas informativas (Odontoloxía con mimo) sobre saúde dental, organizadas polo Concello. As sesións foron impartidas pola odontóloga local Nati Mirás, da Clínica Dental do mesmo nome, emprazada en Porto do Son. Foron gratuítas e divulgativas, e a relatora achegou recursos xenéricos e específicos de utilidade para fomentar a saúde dental, facendo fincapé nas persoas maiores, dependentes e, tamén, coidadoras.
A odontóloga fixo un repaso polas doenzas bucais máis comúns e sobre as diferentes metodoloxías e hábitos que podemos poñer en xogo para combatelas e ter un envellecemento saudábel.
A primeira das actividades celebrouse o pasado 8 de febreiro na Casa da Cultura de Xuño e a segunda o 15 de febreiro no Local Náutico de Porto do Son.
Foi, segundo informou o Concello, “unha maneira amena de achegar a información ás persoas que máis a precisan”.
